ЦХИНВАЛ, 7 ноя — Sputnik. Ирон зарджытæ айзæлдзысты Санк-Петербурджы Филармонийы стыр залы сценæйыл, æххæст сæ кæндзæн оперон зарæггæнæг, Хуссар æмæ Цæгат Ирыстоны адæмон артисткæ Джиоты Вероника.
Джиоты Вероника цæгатирыстойнаг зарæггæнæг Хуытъыгаты Маринаимæ сценӕмæ рахиздзæн къуырисæры, дунейы оперон зарæггæнджыты концерт "Царица песня"-йы. Уыдон сæххæст кæндзысты дыууæ зарæджы — "Терчы бабызтæ" æмæ "Иу хатт мӕм ракæс уарзонау".
"Знон æнафонтæм репетици кодтам Маринæйимæ, "Терчы бабызтæ" фыццаг нывæзты нæ уыдысты, уымæ гæсгæ йæм хастам фæстаг ивындзинæдтæ. Уымæй дарддæр ма æз сæххæст кæндзынæн уырыссаг адæмон зарджытæ хоримæ. Концерт уыдзæн стыр, бирæнымæц зарæггæнджыты хайадистæй. Уыдзæн ма дзы бирæ коллективтæ Уæрæсейы горæттæй", — радзырдта Sputnik оперон зарæггæнæг.
Уый ма банысан кодта, ирон публикæйæн Санкт-Петербурджы мадӕлон ӕвзагыл зарджыты зæлтæ стыр сценæйыл кӕй уыдзысты æцæг лæвар.
"Питеры ирæттæ ‘нæрхъæцæй æнхъæлмæ кæсынц ацы концертмæ. Цæуы мæм бирæ телтæ, фæрсынц мæ, цымыдис кæнынц. Мæ хъуыдымæ гæсгæ, концерты бирæ уыдзæн ирæттæ", — бафтыдта йæ ныхæстæм зарæггæнæг.
Концерт "Царица песня"-йы Джиоты Вероникӕйӕн уыдзæн йæ фыццаг рахызт санкт-петербургаг филармонийы сценæмæ ирон зарджытимæ. Концерт "Царица песня" — ног проект, цы ран классикон оперæйы стъалытæ æххæст кæнынц Уæрæсейы адæмты националон зарджытæ.
