ЦХИНВАЛ, 8 ноя — Sputnik. Хуссар Ирыстоны дыццæджы ссæрибар кодтой Гуырдзыстоны æхсæз æмбæстаджы, кæцытæ ивгъуыд улæфт бонты фехæлдтой паддзахадон арæн, фехъусын кодтой Sputnik Ӕдасдзинады паддзахадон комитеты пресс-службæйы.
Гуырдзыстоны æхсæз æмбæстаджы æрурæдтой 5 æмæ 6 ноябры Хуссар Ирыыстоны Цхинвалы æмæ Знауыры районы.
"Оперативон-сгарæн куыстыты фæстиуæгæн Хуссар Ир æмæ Гуырдзыстоны хсæн паддзахадон арæныл Цхинвалы районы Дисеу æмæ Знауыры районы Балтайы хъæутæм хæстæг арæны фæтк фехалыны тыххæй æрурæдтой Гуырдзыстоны æхсæз æмбæстаджы", — загътой ПӔК-ы.
Фæткхалджытæ разындысты Гуры районы Дицы хъæуккаг Паата Мдзинарашвили æмæ Хашуры районы Цагвлийы хъæуы фондз цæрæджы — Георгий Киладзе, Георгий Авуладзе, Элгуджа Гелашвили, Шота Гелашвили æмæ Тамаз Иладзе.
Цхинвалы æмæ Знауыры районон тæрхондæтты арӕнсӕтджытӕн суынаффæ кодтой административон бæрндзинад æмæ сӕ ивар бафидыны фæстæ адæттой Гуырдзыстонмæ.
