ЦХИНВАЛ, 10 ноя — Sputnik, Козаты Диана. Цхинвалы мэр Ӕлборты Алан нӕ фӕнд кӕны 2017 азы президентон ӕвзӕрстыты йӕ кандидатурӕ раразмӕ кӕнынмӕ, загъта уый цыппӕрӕмы журналисттимӕ фембӕлды рӕстӕджы.
Хуссар Ирыстон 2017 азы уалдзӕджы ногӕй ӕвзардзӕн бӕстӕйы сӕргълӕууӕджы. Ӕхсӕнады активонӕй уынаффӕтӕ кӕнынц фидӕны кандидатты тыххӕй, бирӕты хъуыдымӕ гӕсгӕ, ӕвзӕстыты хайад исдзӕн Цхинвалы мэр дӕр.
"Кандидатты номхыгъды сымах мӕ ном нӕ фендзыстут. Ӕз ӕвзӕрстыты рӕстӕджы балӕудзынӕн ныры президент Тыбылты Леониды фарс", — загъта уый.
Ӕлборты Алан Цхинвалы администрацийы сӕргълӕууӕгӕй кусы 2013 азӕй фӕстӕмӕ. Уымӕй размӕ та уыд Ленонгоры районы сӕргълӕууӕджы хӕдивӕг.
