ЦХИНВАЛ, 17 ноя — Sputnik, Плиты Фатимӕ. Цхинвалы фæбæрæг ис Ирыстоны зынгхуыст хъайтар Козаты Левы æхсæзæм номарæн мини-футболы турниры уæлахиздзау. Ерысты фыццаг бынат бацахста Цхинвалы 5-ӕм скъолайы командӕ.
Мини-футболы турнир цыд Цхинвалы 4-æм ноябрæй фæстæмæ. Йӕ финал ын снысан кодтой Козаты Левы райгуырӕн бонмӕ. Ӕвзӕр боныгъӕдмӕ ӕнӕкӕсгӕйӕ, цыппар командӕйӕ алкӕцы дӕр тырныдта уæлахиздзау суæвын кӕнӕ призон бынæттæ бацахсынмæ.
Матчтæм йæ цæст дардта Козаты Левы фыды æфсымæр, футболы тренер Козаты Вячеслав.
"Левик уыд хорз, перспективон футболист. Нæ йын бантыст цæрын. Фæлæ не ‘хсæнӕй ацыд хъайтарæй. Стыр бузныг, æрвыл аз йын йæ ном кæй ссарынц æмæ азæй-азмæ кӕй фылдæр кæныц йӕ мысӕн турниры архайæг командæты нымæц дæр", — загъта Левы фыды ӕфсымӕр Козаты Вячеслав.
Фыццаг бынатыл тох кодтой гимнази "Рухс" æмæ 5-ӕм скъолайы командæтӕ. Турниры æртыккаг бынатыл тох та цыд 2-æм скъола æмæ гимнази "Альбион"- ы æвзонг футболистты хсæн.
Цымыдисон ӕмӕ эмоционалон хъӕзтыты фӕстиуӕгӕн уӕлахиздзау бацис Цхинвалы 5-ӕм скъолайы командӕ. Дыккаг бынат бацахста гимнази "Рухс" ӕмӕ æртыккаг бынатыл та ацыд ивгъуыд азы уæлахиздзау — Цхинвалы 2-ӕм скъолайы командæ.
Дыууæ къуырийы дæргъы ерысты фæстиуæгæн ма фæбæрг сты турниры хуыздæр хъазджытæ дæр. Хуыздæр размæбырсæгыл нымад æрцыд 5-ӕм скъолайы ахуырдзау Галуанты Аслан. Хуыздæр дурагæс разынд 2-æм скъолайы командæйы хъазæг Бибылты Андрей. Турниры хуыздæр хъазджыты нымӕц ма баххӕст кодта гимнази "Рухс"-ы командӕйы хъахъхъæнæг Къæбысты Дауыт.
Уæлахидзау командӕ æмæ призертæ хорзæхджын æрцыдысты кубоктæ, майдантæ, грамотӕтæ æмæ пуртитæй. Финалон тох фенынмæ æмæ призерты хорзæх кæнынмæ бацыдысты спорты комитеты, горæты администрацийы спорты хайады æмæ æхсæнадон организациты минæвæрттæ.
Ирыстоны хъайтар Козаты Лев фæмард 2008 азы августы Гуырдзыйы агрессийы рæстæджы. Знаджы ныхмӕ тох кӕнгӕйӕ уый равдыста стыр хъӕбатырдзинад. Йæ амæлæты фæстæ Козаты Лев хорзæхджын æрцыд Хуссар Ирыстоны уæлдæр æфсæддон хорзæх —Уацамонгæйы орденæй.
