Транскамыл бакуыстой Уӕлвӕткон уавӕрты рӕстӕджы архӕйдтыл

ЦХИНВАЛ, 18 ноя — Sputnik, Биазырты Дзерассӕ. Транскамыл уагъд ӕрцыдысты егъау ахуыртӕ. Уым хайад райстой трассӕйыл цы структурӕтӕ кусынц, уыдон иууылдӕр. Ирвӕзынгӕнджытӕ, сыгъдхуыссынгӕнджытӕ, ПАИ, катастрофӕты медицинӕйы, фӕндагон службӕ ӕмӕ зӕйты ныхмӕ службӕйы кусджытӕ.

Ацы ахуыртӕ уагъд цӕуынц ӕрвылаз дӕр зӕйтӕй тӕссаг сезоны агъоммӕ. Сӕ сӕйраг нысан — стратегион ӕгъдауӕй нысаниуӕгджын автомагистралыл змӕлды ӕдасдзинад фӕбӕрзонддӕр кӕнын.

Траскам у Уӕрӕсейы тӕссагдӕр фӕндӕгтӕй иу, ис дзы 80-йӕ фылдӕр зӕйцӕуӕн бынаты. Фæндагон службæты, Фæндагон змæлды æдасдзинады фæдыл паддзахадон автоинспекцийы кусджытæ, ирвæзынгæнджытæ, арæнхъахъхъæнджытæ æмæ Катастрофæты медицинæйы дохтыртæ хъуамæ кусой куыд иу механизм, æнæ рæдыдтытæй æмæ къуылымпыйæ. Æрмæстдæр ахæм куысты фæрцы ам, Хуссар Ирыстон Уæрæсеимæ цы иунæг фæндаг иу кæны, ис фадат æнæрлæугæ æдас фæндагон змæлдæй сифтонг кæнын æмæ трагеди ма руадзынӕн.

"Ацы аз ахуыртӕ уагъд цӕуынц ранӕуӕггонд регламентмӕ гӕсгӕ, уый та баст у ууыл ӕмӕ кӕцыдӕр структурӕты ис ног къухдариуӕггӕнджытӕ. Ӕмӕ ныр мах кусӕм ӕмгуыстады алы аспектыл дӕр, Транскавказы автомагистралыл транспорт цæуыны æдасдзинад сифтонг кӕныны фӕдыл", — загъта Цӕгат Ирыстоны УУМ-ы Сӕйраг управленийы сӕргълӕууӕг Александр Хоружий.

Уый банысан кодта, уӕлхох трассӕйыл зӕйтӕ кӕй райдайынц цӕуын ноябры ӕмӕ адарддӕр вӕййынц апрелмӕ.

"Ам ныууарыд фыццаг мит ӕмӕ мах алы уысм дӕр хъуамӕ уӕм цӕттӕ уавӕры февзӕрмӕ. Хъуамӕ уӕм цӕттӕ цыфӕнды уавӕрмӕ дӕр, цӕмӕй бахъуыды рӕстӕджы максималон цыбыр ӕмгъуыдмӕ сӕндидзын кӕнӕм автомобилон змӕлд нысаниуӕгджын трассӕйыл", — банысан кодта управленийы сӕргълӕууӕг.

Ӕмгуыстад æмæ кæрæдзийæн æххуыс Транскамыл сты æмбæлон куысты иунæг бындур, кӕцытӕ ратдзысты фадат цыбыр ӕмгъуыдмӕ трассӕйыл ӕнӕкъуылымпы ӕмӕ ӕдас змӕлд сфитонг кӕнынӕн.

Транскавказы автомагистраль Ирыстоны цæрджытæн хуымæтæг фæндаг нæу, уый у иунæг фæндаг, кæцы иу кæны дихгонд адæмы. Уымæ гæсгæ, Транскамы уавæрмæ ирвæзынгæнджыты æмæ фæндагон службæты æрдыгæй ис æппынæдзух хъусдард. Специалистты ныхæстæм гæсгæ, элементтӕ иууылдӕр ӕххӕст ӕрцыдысты тагъд ӕмӕ гъӕдджынӕй. Фӕстиуджытӕ равдыстой, структурӕтӕ иууылдӕр кӕй сты хорз цӕттӕ зымӕгон рӕстӕгмӕ.