ЦХИНВАЛ, 24 ноя — Sputnik, Болататы Алина. Цӕгат Ирыстонмӕ фыццаг визитимӕ ӕрцыд УФ президенты ӕххӕстбарджын минӕвар Цӕгаткавказаг федералон зылды Олег Белавенцев.
Олег Белавенцевы фыццаг ӕмбырд Цӕгат Ирыстоны сӕргълӕууӕг Битарты Вячеславимӕ уагъд ӕрцыд комкоммӕ Беслӕны аэропорты.
"Фыцца хатт ӕрцыдтӕн кусӕгон балцы. Ис нӕм бирӕ проблемон фарстытӕ, кӕцытӕ хъӕуы аскъуыддзаг кӕнын. Мах баскусдзыстӕм уыдон аскъуыддзаг кӕныны фӕдыл программӕйыл. Бынтӕ нын баззад тынг вазыгджын. Фӕлӕ проблемӕтӕ хъӕуы скъуыддзаг кӕнын — мах сӕ куы нӕ райхалӕм, уӕд ничи", — загъта ӕххӕстбарджын минӕвар.
Белавенцев Цӕгат Ирмӕ ӕрцыд фыццаг хатт. Ӕххӕстбарджын минӕвары бынаты йӕ снысан кодтой ацы июлы Сергей Меликовы бӕсты.
Йӕ иубонон визиты рӕстӕджы ӕххӕстбарджын минӕвар бабӕрӕг кӕндзӕн Зӕдты горӕт Беслӕны, Цӕгат Ирыстоны гуманитарон ӕмӕ социалон иртӕстты институт ӕмӕ ауаддзӕн цалдӕр ӕмбырды.
