ЦХИНВАЛ, 28 ноя — Sputnik, Козаты Диана. Хуссар Ирыстоны хицӕуттӕ ныфс ӕвӕрынц уазӕгдон "Ирыстон"-ы ӕддаг бакаст бахъахъхъӕнын, кӕд ныры бӕстыхай бахъӕуа ныппырх кӕнын ног уазӕгдоны арӕзтадӕн, уӕддӕр.
Къуырисӕры кӕцыдӕр уӕрӕсейаг дзыллон информацийы фӕрӕзты апарахат информаци, Хуссар Ирыстоны разамынад кӕй радих кӕндзӕн 20 милуан сомы Цхинвалы нырыккон уазӕгдоны проекткӕнынадӕн.
Экономикон райрӕзты министр Зӕгъойты Вильямы ныхӕстӕй мыхуыры фӕрӕзтӕ фехъусын кодтой, кӕй райстӕуыд уынаффӕ ныры бӕстыхай ныппырх кӕныны фӕдыл, "цӕмӕй ӕхца цалцӕг кӕныныл ма бахардз уой".
Социалон хызӕгты уайтагъд айтынг сты карз дискусситӕ уый фӕдыл. Горӕты цӕрджытӕй чидӕртӕ, кӕцытӕ смӕсты сты "архитектурӕйы цыртдзӕвӕн " ныппырх кӕныны скъуыддзаджы фӕдыл, рахуыдтой цау фыдгӕнон ӕмӕ ӕрдомдтой ацы фӕнд аивын.
"Цӕмӕн хъӕуы пырх кӕнын, советон аразджытӕ ӕнустӕм цы арӕзтой, уый?! Цӕмӕн хъӕуы ивын зӕронд зӕрдӕхӕлар Цхинвалы бакаст, алы цӕрӕгӕн дӕр зынаргъ Цхинвалы нырыккон архитектурӕ?!", — фыссынц социалон хызӕгты пайдагӕнджытӕ.
Экономикон райрӕзты министр Зӕгъойты Вильям бамбарын кодта Sputnik, уазӕгдон "Ирыстон"-ы реконструкци кӕнӕ ныппырхы фарст скъуыддзаг кӕй ӕрцӕудзӕн ӕрмӕстдӕр экспертизӕ ауадзыны фӕстӕ, нырма уал дзырд кӕуы проекткӕнынадыл.
"Экспертизӕ ауадзыны фӕстӕ, кӕцы сбӕлвырд кӕндзӕн, бӕстыхай бӕззы реконструкцийӕн, ӕви хъӕуы аразын ног, райст ӕрцӕудзӕн ӕлхынцъон скъуыддзаг. Мах, кӕй зӕгъын ӕй хъӕуы, ныфс ис, кӕй нын уыдзӕн фадат уазӕгдоны реконструкци ауадзын", — загъта министр.
Уый банысан кодта, арӕзтад кӕнӕ реконструкцийӕн фӕрӕзтӕ рахицӕн кӕй ӕрцӕудзысты Инвестицион программӕйы уылты, объекты заказгӕнӕг ӕмӕ фӕрӕзтӕй пайдагӕнӕг та уыдзӕн Арӕзтады министр.
"Кӕй зӕгъын ӕй хъӕуы, уазӕгдон у ӕнӕмӕнгхъӕуӕг объект — ууыл ничи дызӕрдыг кӕны. Фӕлӕ экспертизӕ кӕд сбӕлвырд кӕна ӕмӕ бӕстыхай у кӕлӕддзаг, уӕд ӕй бахъӕудзӕн ныппырх кӕнын ӕмӕ ногӕй амайын. Куыдфӕнды ма уа, йӕ фасад баззайдзӕн ныры хуызы", — банысан кодта Зӕгъойты Вильям.
Арӕзтады министрады Sputnik куыд фехъусын кодтой, афтӕмӕй нырма бӕлвырд не ′рцыдысты нӕдӕр цас ӕхца бахъӕудзӕн, уыцы суммӕ, нӕдӕр нардуатисӕг, кӕцыйыл баууӕнддзысты ахӕм куыстыты гуырахст.
"Алцыдӕр ис проекткӕнынады стадийыл. Документтӕ иууылдӕр ӕрбавдыст ӕрцӕудзысты уӕрӕсейаг-хуссарирыстойнаг ӕхсӕнхицауадон къамисы радон рабадтыл, кӕцы уагъд ӕрцӕудзӕн декабры Мӕскуыйы", — загътой Арӕзтады министрады пресс-службӕйы.
Уазӕгдон "Ирыстон"-ы бӕстыхай арӕзт ӕрцыд 1930-ӕм ӕзты Театралон фӕзуатыл Цхинвалы. Ацы бӕстыхай сфӕрӕзта ӕрмӕст ССР цӕдисы ныппырх нӕ, фӕлӕ ма дыууӕ хӕсты Хуссар Ирыстоны ӕмӕ диссаджы ирвӕзт акодта. Уый хаст у Хуссар Ирыстоны архитектурӕйы цыртдзӕвӕнтӕм.
