ЦХИНВАЛ, 9 дек — Sputnik, Плиты Фатимӕ. Фæсивæдон инициативæты центр "Ног фæлтæр" Цхинвалы фыццаг хатт ауадздзӕн турнир пейнтболæй, фехъусын кодта Sputnik центры сæрдар Цхуырбаты Сергей.
Ерыстæ цæудзысты хуыцаубоны Цхинвалы, микрорайон Текстилы. Командæтæ тох кæндзысты президенты призтыл. Хайадисджыты сæрмагонд дарæс æмæ хæцæнгарзæй сифтонг кæндзысты организатортæ.
"Абон фæуд кæны турниры хайадисты тыххӕй куырдиæттæ райсыны æмгъуыд. Ныридӕгӕн уал сӕ куырдиӕттӕ ӕрбавдыстой 8 командæйы. Уыдон фаг сты ерыстӕ ауадзынæн", — радзырдта организатор.
Цхуырбаты Сергей ма банысан кодта, ерысты уæлахиздзау æмæ призертæ хорзæхджын кӕй æрцæудзысты æхцайы премитæй дӕр — 20,10 æмæ 5 мин сомӕй.
