ЦХИНВАЛ, 12 дек — Sputnik. Англисаг футболон клуб "Эвертон" ацы къуыри ауагъта бадзырдтæ мæскуыйаг ӔЦСК-ы æрдæгхъахъхъæнæг, Уæрæсейы æмбырдгонды уæнг Зæгъойты Аланы минæвæрттимæ, цӕмӕй ирон футболист ахиза ливерпульаг командæмæ, хъусын кæны Р-Спорт.
Амæй размæ ДЗИФ хъусын кодтой, Аланы фæхоныны хъуыды ма кӕй ис англисаг "Арсенал", "Челси", "Манчестер Сити", "Ньюкасл", "Тоттенхэм", "Вест Хэм", италиаг "Рома" æмæ дортмундаг "Боруссия"-мӕ. Ирон футболисты трансферы аргъ у 15 милуан евро.
Ивгъуыд къуыри "Эвертон"-ы директор Стив Уолш йæ цæст дардта Зæгъойты Аланы хъазтмæ "Лига Чемпионов"-ы. Лондоны "Тоттенхэм" æмæ ӔЦСК хъазт фæцис 3:1 хыгъдæй. Уæрæсейаг командæйы пайдайæн иунæг пурти бакъуырдта Алан.
Р-Спорт бæрӕггæнæнтӕм гæсгæ, "Эвертон"-ы фæнды Аланы фæхонын зымæгон трансферон сæрибар рæстæджы.
Зæгъойты Алан ӔЦСК-ы хъазы 2007 азы ноябрӕй фӕстӕмӕ. Иумæйагæй сисгæйæ, уый 284 хъазты мидӕг бакодта 62 пуртийы, æртæ хатты рамбылдта чемпионат æмæ Уæрæсейы Суперкубок, цыппар хатты та бæстæйы Кубок.
