Сабеты Аланӕ, Sputnik
Едзиты Сосланбег кӕд нымад у фыццаг ирон скульпторыл, уӕддӕр йӕ куыстытӕн Мӕскуыйы равдыст уыдзӕн фыццаг хатт. Уӕрӕсейаг столицӕмӕ цӕгатирыстойнаг паддзахадон музейӕ ӕрластой ирон нывгӕнӕджы 24 куысты.
Едзиты Сосланбеджы ном адӕмы хсӕн хъуыстгонд нӕу, фӕлӕ сфӕлдыстадон ӕхсӕнады йӕ куыстытӕ сты тынг популярон, уыдон удцырын кӕнынц бирӕ ӕвзонг нывгӕнджыты. Скульптор ныххӕцыд йӕ фыд — дургусӕджы дӕсныйадыл ӕмӕ ӕрӕвнӕлдта мемориалон объекттӕ аразынмӕ, хӕдзӕртты систӕ монументалон бавӕрдтӕй фӕлындынмӕ. Афтӕ ма куыста ингӕнты цыртытыл дӕр. Рӕстӕджы цыдимӕ Сосланбег райдыдта аразын адӕймаджы фигурӕтӕ дӕр ӕмӕ цадӕггай бафтыд нывгӕнӕг-пластикы аивадыл.
"Нырма уал йӕ куыстытӕ уыдысты тъӕпӕн рельефтӕ, стӕй сӕ фӕкъуыпдӕр кодта. Куыд рагон нывгӕнджытӕ, зӕгъӕм, Микеланджело, афтӕ Едзийы фырт дӕр тырныдта дурӕн йӕхи формӕ бахъахъхъӕнынмӕ. Уый-иу Микеланджелойау ралвӕста дурӕй адӕймаджы буары формӕ", — радзырдта равдысты куратор Людмила Андреева.
Уый банысан кодта, тынг ахсджиаг кӕй у бахъахъхъӕнын Едзиты Сосланбеджы цыртытӕ, кӕцытӕ ныртӕккӕ сты гом арвы бын ӕмӕ сӕ пырх кӕны рӕстӕг.
Равдыст ауадзыны хъӕппӕрис равдыста зындгонд ирон нывгӕнӕн Соскъиты Владимир, кӕцы у скульптор сфӕлдыстадӕн ӕнувыд табугӕнӕг.
Равдыст "Дыууӕ легендӕйы параллельтӕ. Едзиты Сосланбег ӕмӕ Нико Пиросмани" байгом уыдзӕн 13 декабры 19:00 сахатыл Нырыккон аивады мӕскуыйаг музейы ӕмӕ адарддӕр уыдзӕн 2017 азы 15 январы онг.
