ЦХИНВАЛ, 29 дек — Sputnik. Хуссар Ирыстоны парламент хӕсдзӕн бӕрндзинад, 2017 азы бюджет кӕй не сфидар кодта, уый тыххӕй, загъта президент Тыбылты Леонид.
2017 азы бюджеты фӕдыл законы проект хаст не ‘рцыд парламенты абоны рабадтмӕ, кӕцы уыд фӕстаг ацы азы.
"Хицауад бавдыста 2017 азы бюджеты фӕдыл законы проект, фӕлӕ уымӕ не ркастысты ӕмӕ не сфидар кодтой парламенты сессийыл. Уый хорз нӕу. Кӕд спикер дзуры, уый хицауады аххос кӕй у ӕмӕ йӕ уынаффӕ бӕтты тӕрхондонон хицауады реформӕимӕ, уӕд ӕз та зӕгъдзӕн, иу дзы иннӕйы кӕй нӕ хъыг дары", — загъта президент.
Бӕстӕйы сӕргълӕууӕг бӕрндзинад сывӕрдта парламенты спикер Бибылты Анатолийыл.
"Уый у хицӕн адӕймаджы каприз. Ӕмӕ дзуапп дӕр дӕтдзӕн спикер йӕхӕдӕг. Парламенты рдыгӕй уый у ӕнӕбӕрнон ахаст", — бахахх кодта Тыбылты Леонид.
Президент ма банысан кодта, бюджет фидар кӕй не рцыд, уыцы хабар кӕй нӕ бандавдзӕн куыстмыздтӕ фидыныл ӕмӕ Инвестпрограммӕйы реализацийыл.
