ЦХИНВАЛ, 17 янв — Sputnik. Цӕгат Ирыстоны скъоладзаутӕ ӕвзӕр дӕттынц ГТО-йы ("Цӕттӕ у куыст ӕмӕ хъахъхъӕнынадмӕ") домӕнтӕ, радзырдта хицауады ӕмбырды РЦИ-Аланийы спорты министр Бӕройты Хасан.
"Республикӕйы скъоладзаутӕн ис лӕмӕгъ фӕстиуджытӕ ГТО-йы домӕнтӕ дӕттыны хъуыддаджы. Скъоладзауты ӕхсӕн ис уникалон сывӕллӕттӕ дӕр, кӕцытӕн ис хорз фӕстиуджытӕ, фӕлӕ иумӕйагӕй дзургӕйӕ, фӕстиуджытӕ хъӕуы бӕрзонддӕр кӕнын", — хъусын кӕны Бӕройты Хасаны ныхӕстӕ 15 регион.
ГТО-йы домӕнтӕ дӕттыны радон этап Цӕгат Ирыстоны райдайдзӕн 3 февралы. Уый уагъд цӕудзӕн командон турниры форматы, цы ран хайад райсдзысты Цӕгат Ирыстоны алы районы минӕвӕрттӕ. Фӕстиуджытӕ сбӕлвырд кӕндзысты "иууыл активон ӕмӕ тыхджын район".
Ӕппӕтуӕрӕсейон фузкультурон-спортивон комплекс "Цӕттӕ у куыст ӕмӕ хъахъхъӕнынадмӕ" (ГТО) гӕсгӕ, цӕрджыты алы кары къордтӕ (6 азӕй 70 азмӕ ӕмӕ уӕлдӕр) хъуамӕ уой цӕттӕ ӕртӕ къӕпхӕны ӕмбӕлон нормативон домӕнтӕ сӕххӕст кӕнынмӕ.
