ЦХИНВАЛ, 18 янв — Sputnik. Ленингоры райцентры сæвæрдтой цырт фыдыбæстæ хъахъхъæнджытæн. Мемориал у 5 метры бæрзæндæн, конд у дыууӕ гарзджын æфсæддоны скульптурӕтӕй, сӕ сӕрмӕ — Ирыстоны герб.
Объект æвæрд æрцыд районы администраци æмæ Ерыстау æлдӕртты музейы цур, йӕ алыварс арæзт цæуы сквер.
"Цырт ныридæгæн æвæрд æрцыд, йæ алфамблай ма хæрзарæзт цæуы сквер. Мемориал арæзт æрцыд нывгӕнӕг Багаты Феликсы проектмæ гæсгæ, йæ скульптор та у Плиты Владимир. Дыууæ гарзджын хъӕбатыры фæлгонцтæ фыст ӕрцыдысты уæрæсейаг æмæ алайнаг æфсæддонтæй", — радзырдта районы администрацийы хистæр Босыкты Алексей.
Уый ма банысан кодта, Ленингоры районы ахсджиаг уыд саразын цырт фыдыбæстæ хъахъхъæнджытæн, уымæн ӕмӕ 1989 азæй фæстæмæ гуырдзиаг-ирон конфликт иууыл тынгдӕр бандӕвта ацы районыл.
"Хæстон архӕйдтыты фæстиуæгæн ивгъуыд ӕнусы 90-æм æзтæй фӕстæмæ районæй, уæлдайдæр та Чысангомæй Цæгат Ирыстонмæ фæлыгъд 900 адæймаджы бæрц, 50 адæймагæй фылдæр та бабын сты знаджы къухтӕй", — бафтыдта йæ ныхæстæм районы хистӕр.
Цырт æрæзт æрцыд президент Тыбылты Леониды инициативæмæ гæсгæ Инвестицион нывæзты фæлгæтты.
