ЦХИНВАЛ, 24 янв — Sputnik. Турнир ленк кӕнынӕй "Зæрин кæсаг" фыццаг хатт уагъд ӕрцӕудзӕн Хуссар Ирыстоны, фехъусын кодта Sputnik фæсивæдон политикæ, спорт æмæ туризмы комитеты пресс-секретарь Софа Исаакян.
Цхинвалы, спортивон комплекс "Олимп"-ы 29 январы сӕ тыхтӕ бавзардзысты 200 сывӕллоны онг. Чысыл ленкгæнджытæ сӕ кармæ гæсгæ дих æрцæудзысты 6 къордыл.
"Ерысты хайад райсдзысты ленк кæныны секциты хъомылгæнинӕгтæ — чызджытæ дӕр æмæ лæппутæ дæр. Æдæппæт куырдиæттæ ӕрбавдыстой 200 сывæллоны бæрц. Уыдонӕн "Зæрин кæсаг" уыдзæн сæ фыццаг фæлтæрддзинад ерысты. Ленкгæнджытæ сæ тыхтæ фæлвардзысты 25 æмæ 50 метры дистанцитыл", — радзырдта Софа Исаакян.
Ерыстæ организацигонд цæуынц фæсивæдон политикæ, спорт æмæ туризмы комитеты тыхтæй.
Хуссар Ирыстоны ленк кӕныны фыццаг секцитæ фæзындысты иу азы размæ. Ныртӕккӕ спорты ацы фадыджы республикæйы ӕдæппæт кусы 8 тренеры.
