ЦХИНВАЛ, 26 янв — Sputnik, Болататы Алина. Цӕгат Иырстоны паддзахадон университеты Студенты бон бафыст ӕрцыд бадзырд ацы уӕлдӕр ахуырадон уагдоны Фӕсарӕйнаг студентты ассоциацийы (ФСА) филиал ӕрбайгом кӕныны фӕдыл.
ФСА-йы президент Аду Яо Никэз куыд загъта, афтӕмӕй Дзӕуджыхъӕуы уӕлдӕр ахуырадон уагдӕтты цы фӕсарӕйнаг студенттӕ ахуыр кӕнынц, уыдонӕн сӕ бон у сӕрибарӕй бахатын ассоциацимӕ, исты проблӕмӕтӕ сын куы сӕвзӕра, уӕд.
"Абон райсом бафыст ӕрцыд бадзырд ЦИПУ-имӕ, кӕцы сбӕлвырд кӕндзӕн нӕ дарддӕры иумӕйаг архӕйдтытӕ. Уыдон та сты — иумӕйаг мадзӕлтты ауагъд, ӕмгуыстады райрӕзт, Дзӕуджыхъӕуы студентон царды размӕцыд", — загъта Аду Яо Никэз.
Уый загъта, ФСА фӕсарӕйнаг студенттӕ цы проблемӕтимӕ ӕрбацӕуынц, уыдон сӕйраджыдӕр баст кӕй сты ӕрвылбонон цардимӕ. Ам алы куырдиат дӕр домы индивидуалон бацыд. Аду Яо Никэз ауагъта фембӕлд студенттӕн сӕхиимӕ, цы ран ӕрдзырдтой иууыл ахсджиагдӕр ӕмӕ нысаниуӕгджын фарстытыл.
"Абон куыд фехъуыстон, афтӕмӕй Дзӕуджыхъӕуы цы фӕсарӕйнаг студенттӕ ис, уыдонӕн сӕйраг у фӕндӕгтыл змӕлды проблемӕ. Кӕйдӕр фӕнды хицӕнӕй цӕрын, арендӕйы ист фатеры, фӕлӕ йын нӕй уыцы фадат. Ис ма хицӕн чысыл проблемӕтӕ, ӕз сӕ хонын цардуагон ӕмӕ, кӕй зӕгъын ӕй хъӕуы, алчидӕр дзы домы хицӕн ӕркаст", — загъта ФСА президент.
Уый ма бафтыдта, зӕгъгӕ, ис карздӕр проблемӕтӕ, фӕлӕ уыдон ӕрмӕст Дзӕуджыхъӕуы не сты, фӕлӕ ӕппӕт Уӕрӕсейы. Уыдон сӕйраджыдӕр сты миграци ӕмӕ куыстифтонгады фарстытӕ.
ЦИПУ-ы минӕвар ӕрсидт фӕсарӕйнаг студенттӕм, цӕмӕй ма ′фсӕрмы кӕной ӕмӕ-иу исты зындзинӕдтӕ сӕвзӕрды рӕстӕджы ӕрбацӕуой филиалмӕ. Уый бахаста ӕнхъарӕн радон фембӕлд ацы февралы ауадзын.
Цӕгат Ирыстоны хицауады сӕрдар Тускъаты Таймураз дӕр фӕуазӕг Студенты боны бӕрӕгбонмӕ. Университеты ректор Огойты Аланимӕ уыдон бабӕрӕг кодтой мадзалы цы секцитӕ уыд, уыдон иууылдӕр.
Зымӕгон бонмӕ ӕнӕкӕсгӕйӕ, ЦИПУ-ы бӕрӕгбоны хайадисджытӕн уыд тӕвд нозт, ирон уӕлибыхтӕ ӕмӕ дзыкка. Мадзалы ирд цау ссис Мӕскуыйаг университеты бындурӕвӕрды тыххӕй императрицӕ Елизаветӕ указ куыд бафыста, уый театрализацигонд сценкӕ. Ӕмӕ националон кӕфтытӕ та сарӕзтой мадзал ноджы ирддӕр ӕмӕ хуызджындӕр.
