ЦХИНВАЛ, 26 янв — Sputnik, Биазырты Дзерассӕ. Рӕспубликӕ Цӕгат Ирыстон — Алани уадзы конкурс иууыл хуыздӕр скульптурӕйы фӕдыл, кӕцыйы сӕнусон уыдзӕн алайнаг адӕмы ирвӕзынгӕнӕг Задалескы Нанайы фӕлгонц. Цырты сразын ӕмӕ сывӕрыны хъуыды фӕзынд Фонд "Задалескы Нана"-мӕ.
Конкурсы хайад исынц куыд номдзыд скульптортӕ, афтӕ бынтон ӕрыгон нывгӕнджытӕ дӕр. Конкурсон куыстытӕ ӕвӕрд сты Уӕрӕсейы Нывгӕнджыты цӕдисы республикон хайады равдыстон залы. Уыдон сты 32 эскизы, нӕй сыл фыст сӕ авторты нӕмттӕ, лӕвӕрд сын ӕрцыд ӕрмӕстдӕр нымӕцтӕ. Организаторты ныхӕстӕм гӕсгӕ, хайадисджыты нӕмтты сусӕг суыдзӕн рӕстаг тӕрхондзинады гаранти.
Нывгӕнджыты цӕдисы сӕрдар Мӕргъиты Таймуразы ныхӕстӕм гӕсгӕ, иу мӕйы фӕстӕ жюри рахӕсдзӕн ӕлхынцъон вердикт сусӕг хъӕлӕсӕппӕрсты руаджы.
"Цыртдзӕвӕнӕн ис стыр нысаниуӕг, уый хъуамӕ суа Ирыстоны ӕппӕт цӕрджыты хъусдарды центр. Жюрийы сконды Фонд "Задалескы Нанайы" минӕвӕрттӕй дарддӕр сты нывгӕнджытӕ, архитектортӕ ӕмӕ скульптортӕ. Зынгӕ ирон историк Бзарты Руслан йӕ хъус дардзӕн, цӕмӕй цырты ӕлхынцъон варианты ма уа исты хъӕндзинӕдтӕ", — загъта Мӕргъиты Таймураз.
Задалескы Нанайы ном хъуыстгонд у Ирыстоны. 14-æм æнусы Тимур куы ныббырста, уæд тæссаг уыд, аланты мыггаг куы фесæфа, уымæй. Æмæ цæмæй уыцы сау хъуыддаг ма æрцæуа, уый тыххæй сылгоймаг æрзылд аланты бæстыл, сæмбырд кодта сидзæр сывæллæтты, акодта сæ дард ранмæ æмæ æрцард Задалескы цур лæгæты. Афтæмæй сæ схъомыл кодта. Задалескы Нанайы ном та сомыгæнæн ссис. Сылгоймæгтæ йæм фæкувынц æмæ дзы курынц сæ бинонты бахъахъхъæнын, кæстæртæм цæст дарын, цот раттын.
Кӕд цырт нырма хъӕуы равзарын, уӕддӕр ын ныридӕгӕн Дзӕуджыхъӕуы бынӕттон хиуынаффӕйады администраци рахицӕн кодта бынат Куйбышевы æмæ Тамайы-фырты номыл уынгты тигъыл.
Суинаг цырты проекттӕ стыр оригиналондзинадӕй нӕ хицӕн кӕнынц, сӕйраджыдӕр уыдон сты бынтон реалистон фӕлгонцтӕ бадгӕ кӕнӕ лӕугӕ сылгоймаджы хуызы, йӕ алыварс сывӕллӕттӕ. Фӕлӕ ӕрбавдисгӕ куыстыты ӕхсӕн ис ахӕмтӕ, кӕцытӕ хъусдард ӕздахынц сӕ концепци, профессионалон куыст ӕмӕ дӕсныйы оригиналон цӕстӕнгасӕй.
Скульптурӕ равзӕрсты хайад райсыны фадат ис цӕрджытӕн дӕр, кӕцытӕн равдыстмӕ ӕрбацӕугӕйӕ сӕ бон у ныууадзын сӕ хъуыды аргъгӕндты чиныджы.
Нывгӕнджыты Цӕдисы Sputnik уацхӕссӕгӕн загътой, Задалескы Нанайы цырт сӕвӕрыны хъӕппӕрисӕн кӕй ис ӕцӕг ӕппӕтадӕмон нысаниуӕг, уымӕ гӕсгӕ, конкурсы фӕуӕлахиз уыдзӕн иууыл хуыздӕр эскиз.
