ЦХИНВАЛ, 26 янв — Sputnik, Козаты Диана. Хуссар Ирыстоны Боксы федераци равзӕрста ног презеденты. Уый ссис амалиуӕггӕнӕг, цхинвайлаг ресторантӕй иу — "Vincenzo"-йы хицау Уалыты Альберт.
Боксы федерацийы ӕмбырд уагъд ӕрцыд цыппӕрӕмы. Ӕхсӕнадон организацийы уӕнгтӕ ӕрдзырдтой ног президенты равзарыны фарстыл.
Ӕмбырды хайад райстой зындгонд тренертӕ Сланты Виталий, Тедеты Алик, Чехойты Алан, Зӕгъойты Игорь, спортсментӕ. Ӕмбырды фӕстӕ мыхуыры фӕрӕзтӕн уагъд ӕрцыд брифинг.
"Фыццаджыдӕр, хъӕуы федерацийы куыст мидисӕй сӕххӕст кӕнын ӕмӕ спорты размӕцыдыл бакусын. Аразын скъолатӕ, уадзын мадзӕлттӕ, ӕндӕр спортивон ӕхсӕнадтимӕ ӕмархайд кӕнын. Зонӕм ӕй, цы къахдзӕфтӕ нӕ хъӕуы аразын ацы фӕдыхдӕхты, фӕлӕ нӕ нывӕзттыл бӕстондӕр уынаффӕтӕн хъӕуы фылдӕр рӕстӕг. Мӕ хъуыдымӕ гӕсгӕ, нӕ къухты ӕнтыстытӕ бафтдзӕн", — загъта Уалыты Альберт.
Сланты Виталийы ныхӕстӕм гӕсгӕ, фӕстаг рӕстӕджы спортивон ӕхсӕнады хъусдард сӕйраджыдӕр здӕхт уыд профессионалон спортсментӕм.
"Уый фӕстиуӕгӕн, ӕнӕ хъусдардӕй аззадысты сывӕллӕттӕ ӕмӕ мах ныртӕккӕ стӕм уыцы ӕмвӕзадыл, цӕмӕй сын баххуыс кӕнӕм сӕ профессионалон рӕзты, спортивон ифтонгадӕй, стӕй ерыстӕм ӕмӕ тренировкӕтӕм цӕуынӕй", — загъта Сланты Виталий.
Ӕхсӕнадӕмон къласы спорты дӕсны Зӕгъойты Игорь дӕр раарфӕ кодта Федерацийы ног президентӕн. Уый равдыста ныфс, ног къухдариуӕгады бын Хуссар Ирыстоны боксы размӕцыд кӕй райсдзӕн ног импульс.
