ЦХИНВАЛ, 20 мар — Sputnik. Турчы столицæ Анкарайы æрбайгом Ирон клубы минæварад, загъта Sputnik клубы дзæуджыхъæуккаг минæварады къухдариуæггæнæг, актер æмæ æхсæнадон архайæг Коцты Ацæмæз.
Проект æрбайгом æртæ азы размæ, ирон æвзаджы клубтæ ныридæгæн кусынц Дзæуджыхъæу, Мæскуы æмæ Санкт-Петербурджы.
"Ныр ис зæгъæн æмæ проект ссис æхсæнадæмон. Архайы цыппар азы æмæ Турк у дыккаг бæстæ, цы ран уый адарддæр кæндзæн йæ куыст. Клубы нысаниуæг у ирон æвзаджы бахъахъхъæнын æмæ парахат кæнын æппæт дунейы", — загъта Коцты Ацæмæз.
Уый ма загъта, анкарайаг клубы сæргъ кæй æрлæууыд æхсæнадон архайæг, "Аланты Ӕппæтдунейон цæдисы" президент Мамсыраты Ирмæ.
"Туркаг ирæттæ стыр цинимæ сæмбæлдысты ацы хъæппæрисыл æмæ нывæндынц иууыл активон хайад ацы проеты реализацийы", — банысан кодта Ацæмæз.
Коцты Ацæмæзæй дарддæр ма клубы æрбайгоммæ Анкарамæ ныхæццæ ирон æвзаджы клубы бындурæвæрæг, амалиуæггæнæг, блогер æмæ æхсæнадон архайæг Дзотты Чермен.
