ЦХИНВАЛ, 23 мар — Sputnik, Годжысаты Анна. Инициативон фæсивæдон къорд президент Тыбылты Леониды æххуысæй Цхинвалы ауагъта акци "Кæрдæгхуыз горæт". Йæ организатортæ æрластой Нальчикæй 300 талайæ фылдæр алы хуссарирыстойнаг скъолайæн дæр.
Ныр бынæттон скъолаты алыварс территоритæ сфæлдындзысты бæрзтæ æмæ алыхуызон уардитæй. Зæлдфæлындæн акцийы организаторты æмрæнхъ хайад райстой скъолаты ахуыргæнинæгтæ дæр. Къорды активист, Цхуырбаты Людвиг нын куыд радзырдта, афтæмæй территори зæлдфæлндыны процессыл цин кодтой куыд ахуыргæнинæгтæ, афтæ ахуыргæнджытæ дæр.
"Скъолаты ахуыргæнджытæ стыр бузныг дзырдтой ахæм хорз хъуыддæгтæ чи организаци кæны, уыдонæн, уæлдайдæр та республикæйы президентæн", — загъта Цхуырбаты Людвиг.
Амæй размæ ма ацы инициативон къорд ахæм акци ауагъта "Мæскуыйаг" микрорайоны — скъола æмæ дыууæ сабидоны. Ныссагътой дзы сæдæ бæласы. Уæд акцийы хайад райста бæстæйы сæргълæууæг йæхæдæг дæр, Тыбылты Леонид ныссагъта дыууæ бæласы скъоламæ бахизæны.
"Мах адарддæр кæндзыстæм зæлдфæлындæн куыстытæ горæты, цæмæй цæрджытæ цин кæной горæт йæ хуыз куыд калы, ууыл", — бамбарын кодтой организатортæ.
Дарддæр ацы бæлæстæ æмæ зайæгойтæм зилдзæн Цхинвалы хæрзарæзтады хайад.
