ЦХИНВАЛ, 28 мар — Sputnik. Адæмон инструментты хуссарирыстойнаг оркестр "Айзæлд" ссис VIII Ӕппæтуæрæсейаг фестиваль-конкурс "Территория музыки — без границ"-ы уæлахиздзау, фехъусын кодта Sputnik оркестры аивадон къухдариуæггæнæг Уалыты Нина.
Фестиваль ацыд Санкт-Петербурджы 25-28 марты. Ӕдæппæт дзы хайад райстой 11 коллективы.
"Нæ оркестр ис "уæлæрвты" фырцинæй, махæн тынг æхсызгон у ахæм конкурсы хайадист, уæлдайдæр та дзы уæлахиздзаутæй кæй ссистæм. Ахæм æнтысты æнхъæл нæ уыдыстæм. Ныртæккæ мах уæлахизимæ раздæхæм Цхинвалмæ", — загъта Уалыты Нина.
Питераг аивадуарзæг адӕм, йӕ ныхæстæм гæсгæ, райгондæй баззад оркестры номырæй. "Уыдон никуы фехъуыстой уырыссаг адæмон инструменттыл æххæст ирон националон уацмыстæ".
Уалыты Нина банысан кодта, ацы фестивалмæ оркестр "Айзæлд" кæй бацыд тынг бæрнонæй, репетици кодтой æрвылбон дæр.
"Территория музыки — без границ" — адæмон инструменттыл аивадон сфæлдыстады фестиваль-конкурс. Гран-прийы хицæуттæ æмæ лауреаттæ райсынц призон бонустæ (уый нымæцы æндæр фестивальты хайадисты фæдыл æнæаргъ бынæттæ науæд та сфæлдыстадон турнетæ), кæцытæн ис æмгъуыд дыууæ азы.
