ЦХИНВАЛ, 28 мар — Sputnik, Плиты Фатимӕ. Хуссарирыстойнаг ӕвзонг боксер Коцты Вадим ссис Ӕхсæнадон-паддзахадон спортивон баиугонд "Юность России"-йы чемпион. Дыццæджы Цхинвалы уæлахиздзауæн тренерон штаб балæвар кодта профессионалон æрмкъухтӕ, ног уæлахизтæм та йын ныфс дӕттынц стырдæр лæвæрттæй.
"Стыр æнтыст бафтыд йæ къухы. Майы та йæм "Уæрæсейы Кубок"-ы æнхъæлмæ кæсæм ног уæлахизмæ, цӕмӕй йын уый фæстæ фадат уа стох кӕнын европæйаг æмæ дунейы ерысты. Куы сӕ рамбула, уӕд ын махӕй лæвæрттæ — велосипед æмæ машинæ", — баныфсæвæрдта боксы скъолайы директор Кокойты Мурат.
Ӕрыгон спортсмен йӕхӕдӕг куыд радзырдта, афтӕмӕй йын ерысты уыд цыппар ныхмæлæуды ӕмӕ йын се ʻппæт дæр ацыдысты æнтыстджынӕй.
"Тæрхонгæнджыты иумæйаг хъудымæ гæсгæ турниры уæлахиздзау сдæн æз. Ныр мæм æнхъæлмæ кæсы бæрзонддæр æмвæзады ерыстæ — "Уæрæсейы Кубок". Ныфсытæ дæттын нæ уарзын, фæлæ тырндзæн уæлахизмæ", — радзырдта чемпион.
Коцты Вадим ныридæгæн у ХИПУ физикон культурæйы факультеты студент. Цхинвалы боксы скъолайы цæттæ кæны фондз азы дӕргъы ӕмӕ ныридӕгӕн ссис ӕхсӕнадӕмон классы спорты мастер. Архайы 69 килограммы уæзы, нырмæ йын уыд 49 тохы, уыдонæй 39 фæуæлахиз ис. Ерысты архайы боксы клуб "Ариана"-йы номæй. Цæттæ йæ кæны тренер Чехойты Алан.
