ЦХИНВАЛ, 29 мар — Sputnik. Уæрæсе æмæ Хуссар Ирыстоны прокуратурæты органтæ хъуамæ адарддæр кæной эффективон æмархайд, уый тыххæй та ныридæгæн хъæуы снысан кæнын дарддæры къахдзæфтæ æхсæнведомствæйон æмгуыстады бадзырды дарддæры реализацийы фæдыл. Ацы фырстытыл йæ хуссарирыстойнаг коллегæтимæ фембæлды рæстæджы æрдзырдта УФ генпрокурор Юрий Чайка.
Уæрæсе æмæ Хуссар Ирыстоны Генералон прокуратурæты минæвæртты фембæлд уагъд æрцыд Мæскуыйы æртыццæджы, хъусын кæны ведомствæйы пресс-службæ.
Юрий Чайка банысан кодта дыууæ бæстæты прокуратурæты органты хайбавæрд уæрæсейаг-хуссарирыстойнаг ахастытæ сфидар кæныны хъуыддагмæ, кæцытæ размæ цæуынц æмгуыстад, хæларад æмæ кæрæдзийæн æххуысы фæдыл бадзырды бындурыл.
Дыууæ ведомствæты æмархайд ног æмвæзадмæ рахизын кæнынæн ахъаз уыдысты генералон прокуратурæты æхсæн æмгуыстады фæдыл разыдзинад, 2009-2011 азты æмархайды бындурон фæдыздæхтты фæдыл меморандум æмæ 2013-2014 азты æмгуыстады программæйы реализаци.
"Юрий Чайка хайадисджыты хъусдард аздæхта Уæрæсе æмæ Хуссар Ирыстоны прокуратурæйы органты эффективон æмархайды æнæмæнгхъæуындзинадмæ. Уый тыххæй уый банхъардта снысан кæнын æхсæнадæмон æмгуыстады фæдыл бадзырды дарддæры реализацийы оптималон фæндæгтæ", — банысан кодтой УФ ГП-йы пресс-службæйы.
Чайка ма бахахх кодта Хуссар Ирыстон æмæ Уæрæсейы прокуратурæты æхсæн æмбаладон ахастыты ахсджиагдзинад æмæ бафидар кодта уыдоны динамикон райрæзт.
