ЦХИНВАЛ, 9 апр — Sputnik, Козаты Диана. Хуссар Ирыстоны президенты æвзæрстыты фæдыл хъæлæскæнынад Сухумы æвзарæн фадыгыл кæронмæ бахæццæ фадыджы официалон сæхгæды æмгъуыдæй цалдæр сахат раздæр, загъта Sputnik ЦӔК-ы секретарь Аулохты Кристина.
ЦӔК арвыста Сухуммæ 50 бюллетены президенты æвзæрстыты æмæ республикæйы ном раивыны фæдыл референдумы тыххæй.
"Хъæлæскæнынад ацы фадыгыл кæронмæ бахæццæ, 50 бюллетень иууылдæр спайдагонд æрцыдысты. Ӕвзарæн къамисы уæнгтæ æрæвнæлдтой нымайынмæ, фæлæ нын протокол нырма не 'рырвыстой", — загъта Аулохты Кристина.
Раздæр МХМ-ы сæргълæууæг Лæууойты Ӕхсар фехъусын кодта, Сухуммæ æрвыст кæй æрцыдысты ведомствæйы кусджытæ дыууæйæ, æвзарæн фадыджы фæтк æмæ документаци бахъахъхъæныны нысанæн.
