ЦХИНВАЛ, 18 апр — Sputnik, Плиты Фатимӕ. Цхинвалы кæцыдæр районты цӕрджытӕ стыхстытсты нуазыны доны цухдзинадӕй — хӕдзӕрттӕм дон куыд ӕмбӕлы афтӕ нӕ цӕуы суанг марты райдианӕй фӕстӕмӕ. Унитарон куыстуат "Водоканал"-ы Sputnik фехъусын кодтой, зӕгъгӕ, уалдзыгон кризисы рæстæджы ма горæтмæ цы дон хæццæ кæны, уый та парахатæй алы районыл дӕр не ʻххæсы. Доны цухдзинады проблемӕйы фæдыл хъæуы бадзурын 050 номырыл.
Цхинвалы донифтонгадимӕ проблемӕтæ фæзынынц алы уалдзӕджы дӕр. Магистралон доны хӕтӕл Едыс-Цхинвалы цы æртæ къалиу ифтонг кæны, уыдонæй дыууæмӕ хӕццӕ кӕны змӕст дон, уымæ гæсгæ сæ уалдзӕджы ахицæн кæнынц. Горӕты районтӕн та саразынц, дон сӕм цы афонты цӕудзӕн, уый график.
"Горæтмæ дон лæвæрд цæуы графикмæ гæсгæ, кæцыдæр районтыл нæ аххæссы. Дон иугъуызонӕй горæтыл байуарыны нысанæн нӕ радгæсон службæ хынцы цæрджыты куырдиæттæ. Радгæсон службæмæ номыртыл цы куырдиттæ æрбацæуы, уыцы адрестыл нæ кусджытæ ацæуынц æмæ проблемӕ иуварс кæныц", — радзырдта "Водоканал"-ы директор Зассеты Сергей.
Уый ма банысан кодта, Дзомагъы доны къалиуыл уагдонæн кӕй ис радгæсон пункт æмæ куыддæр дон расыгъдæг вæййы, афтæ йæ баиу кæнынц магистралон хӕтӕлмӕ.
"Ацы бонты та къæвдаты аххосагæй дон размӕст ӕмӕ горæтмæ цыд æрмæстдæр сæйраг магистралон хаххы дон, уымæ гæсгæ цӕрджытӕ тынгдæр рахатыдсты доны цухдзианд", — банысан кодта уый.
Дон хуымæтæг режиммæ гæсгæ Цхинвалы рацæудзæн 10-20 боны æмгъуыдмæ. Бындуронæй та донифтонгады проблемæ Цхинвалы аскъуыддзаг кæндзысты 2020 азмæ — Инвестицион нывæзты фæлгæтты арæзт æрцæудзæн фæстауæрцон доныхæтæл.
