ЦХИНВАЛ, 20 апр — Sputnik. Архайгæ президент Тыбылты Леонид йæ æххæстбартæ раттыны размæ фембæлд хицауад æмæ ведомствæты сæргълæуджытæимæ, цæмæй сын зæгъа бузныг иумæйаг куысты тыххæй, фехъусын кодта президенты пресс-службæ.
Тыбылты Леонид майрæмбоны ратдзæн йæ æххæстбартæ Хуссар Ирыстоны ног президент Бибылты Анатолиймæ.
"Бузныг зæгъын хицауады, мæ командæйы алы уæнгæн дæр иумæйаг куысты тыххæй. Ацы æзты мидæг мах аздæхтам æппæт тыхтæ æмæ фадæттæ, цæмæй не 'мбæстæгты æмæ республикæйы цард фæхуыздæр кæнæм", — загъта Тыбылты Леонид.
Уый банысан кодта, республикæйы къухдариуæгады раз кæй лæууыд бирæ хæслæвæрдтæ, бакуыст æрцыд райрæзты программæтыл, кæцытæ хъуамæ æрцæуой реализацигонд.
Хицауады уæнгтæ загътой бузныг президентæн, иумæ бакусыны фадат сын кæй уыд, уый тыххæй æмæ банысан кодтой йæ лæггæдтæ республикæйы стабилондзинад æмæ дидинæфтыды ныллæуыны хъуыддаджы.
Тыбылты Леонид æртыццæджы ссæрибар кодта сæ бынæттæй чиновниктæ æмæ тыхон структурæты къухдариуæггæнджытæй кæйдæрты.
Хуссар Ирыстоны закондæттынадмæ гæсгæ, ног президент йæ бынатмæ куы бахиза, уый фæстæ хицауад æрвыст æрцæуы отставкæйы.
