ЦХИНВАЛ, 27 апр — Sputnik. Клуб "Аполлон" сарæзта студенттæн ацы сезоны сгарæн балц, фехъусын кодта Sputnik клубы къухдариуæггæнæг Къацты Олеся.
Балцæн организатортæ равзæрстой рагон хъæу Эгра, кæцы ис æвæрд æмрæстæджы дыууæ районы арæныл — Знауыры æмæ Цхинвалы.
"Студенттæн сгарæн балц уыд культурон æмæ историкон æгъдауæй ахуырадон. Эграйы хъæу мах хуымæтæгæй нæ равзæрстам — цæхгæр схизæнтæй дарддæр ма уый хъуыстгонд у бирæнымæц сыгъдæг бынæттæ æмæ зæппадзтæй — уыдон та сты нæ культурон бынтæ. Уыймæй дарддæр ма организатортæ басгæрстой клубы æрыгон уæнгты фæразондзинад, цæмæй сæ бацæттæ кæной дæргъвæтиндæр æмæ вазыгджындæр балцтæм", — загъта Олеся.
Балцы хайад райстой ХИПУ-ы 35 студенты. Клубы къухдариуæггæнæджы ныхæстæм гæсгæ, фæсивæд æнцонтæй сфæрæзтой уæргъæвæрд, цæхгæр схизæнтæ æмæ дæргъвæтин дистанцитæм æнæкæсгæйæ. Уый ма бафтыдта, студенттæ цæттæ кæй сты стыр балцытæм, кæцытæ уагъд цæуынц æрвылаз дæр сæрды.
"Кæмæндæрты уый уыд сæ фыццаг балц, фæлæ цæсгомджынæй ахызтысты фæлварæнтæ. Студенттæ фистæгæй цыдысты Зары хъæдыл, ахызтысты цæугæдоны сæрты, хызтысты уæлæмæ цæхгæр къуылдымтыл. Уыдон ахызтысты зындзинæдты сæрты æмæ ныр цæттæ сты вазыгджындæр хæрдмæцыдмæ", — банысан кодта Къацты Олеся.
Студентон клуб "Аполлон" сарӕзта 1972 азы 1 марты историкон зонӕдты кандидат Саулохты Тамара Никалайы чызг ХИППИ-ы (абоны ХИПУ) истори ӕмӕ филологийы факультеты бындурыл.
Клубы уӕнгтӕ 44 азы дæргъы басастой Ирыстоны бæрзонддæр хæхтæ, сæ фæндаг ракодтой рæсугъддæр кæмттыл, федтой фыдæлты мæсгуытæ, зӕппӕдзтӕ æмæ лæгæттæ.
