ЦХИНВАЛ, 28 апр — Sputnik. Цæгат Ирыстоны сæргълæууæг Битарты Вячеслав радзырдта УФ президент Владимир Путинæн, 2016 азы хатдзæгтæм гæсгæ республикæйы хисæрмагонд æфтиæгтæ кæй фæфылдæр сты 25% бæрц — нозты продукци рауагъды легализацийы фæрцы, фехъусын кодта РИА Новости.
Цыппæрæмы изæрæй УФ сæргълæууæг райста Битарты Вячеславы Кремлы.
"Хисæрмагонд æфтиæгтæ фæфылдæр сты 25% бæрц æмæ уыд ахъаз республикон бюджеты стабилизацийæн. Уый та фыццаджыдæр къухы бафтыд, нозты продукци æххæстæй легализацигонд кæй æрцыд, уый фæрцы", — загъта Битарты Вячеслав.
"Хорз", — загъта Путин.
Цæгат Ирыстоны сæргълæууæг ма фехъусын кодта, республикон хицæуттæ активонæй кæй кусынц социалон-экономикон райрæзты программæйыл. Уый равдыста ныфс, ацы куыст кæронмæ кæй бахæццæ уыдзæн 2017 азы сентябры.
Стыр хъусдард, йæ ныхæстæм гæсгæ, здæхт цæуы социалон сферæмæ æмæ майы указты æххæст кæнынмæ.
"Кусæм ма, цæмæй зæххы фадгуытæй ифтонг æрцæуой, æртæ æмæ уымæй фылдæр сывæллон кæмæн ис, уыцы ныййарджытæ", — бафтыдта уый.
