ЦХИНВАЛ, 11 май — Sputnik, Плиты Фатимӕ. Хуссарирыстойнаг æрыгон нывгæнджытæ ссисты IV æхсæнадæмон конкурс-фестиваль "Петербуржский звездопад"-ы лауреаттæ, фехъусын кодта Sputnik Цхинвалы нывгæнæн скъолайы директор Ӕлборты Ӕхсæртæг.
IV æхсæнадæмон конкурс-фестиваль "Петербуржский звездопад" цыд Санкт- Петербурджы æхсæнадæмон проект "Душа моей родины"-йы фæлгæтты. Ацы аз уым фыццаг хатт архайдтой Цхинвалы нывгæнæн скъолайы ахуырдзаутæ, уыдон се ʻппæт дæр ссисты фыццаг къæпхæны лауреаттæ, сӕ ахуыргæнæг Сабанты Анжела та райста бузныджы фыстæг.
"Гуыцмæзты Виктория æмæ Хъуылымбегты Виктория ссисты фыццаг къæпхæны лауреаттæ графикæйы здæхæны. Хъуылымбегты чызг бавдыста дыууæ куысты "Нарты фæткъуы" æмæ "Удӕгас четæн". Конкурсы аргъгæнджытæ йын дыккаг куысты "Темӕ райхалыны оригиналон фадæтты" тыххæй радтой фыццаг бынат. Гуыцмæзты Виктория та хорзæхджын æрцыд "Националон хицæндзинӕдты зонындзинады" тыххæй, уый конкурсмæ бавдыста нывтæ "Национ хор" æмæ "Кафт", — радзырдта Ӕлборты Ӕхсæртæг.
Уый ма банысан кодта, æртыккаг архайæг Ӕлборты Аслан та кӕй расгуыхт хуызфыссынады номинацийы.
"Ӕлборты Асланы куыст "Райгуырæн хъæу" рахицæн кодтой хуызфыссынады "Сфæлдыстадон индивидуалондзинад"-ы тыххæй. Нæ æрыгон нывгæнджыты ахуыргæнæг Сабанты Анжела та райста бузныджы фыстæг. Уымæй дарддæр ма нӕ хайадисджытӕ райстой сертификаттæ, кæцыты фæрцы сын фæрогдæр уыдзысты ацы конкурсы архайыны фадæттæ", — бафтыдта йæ ныхæстæм уый.
Фестиваль-конкурсы фæархайынц курдиатджын адæм ахӕм номинациты: вокал, хоры зард, инструменталон жанр, хореографи, кафты театр, модæйы театр, нывкæнынад, фотографикæ. Конкурсы домæнмæ гæсгæ йӕм бавдисæн ис æрмæстддæр дыууæ куысты.
