ЦХИНВАЛ, 12 май — Sputnik. Бацыд йæ тыхы Хуссар Ирыстон æмæ Уæрæсейы æхсæн республикæйы иудадзыг цæрæг уæрæсейаг æмбæстæгты пенсион ифтонгады тыххæй бадзырд, хъусын кæны Мæскуыйы уæвæг хуссарирыстойнаг дипломатон уагдоны пресс-службæ.
Минæвæрады куыд банысан кодтой, афтæмæй майрæмбоны уагъд æрцыд 2016 азы 25 ноябры Мæскуыйы бафыстгонд бадзырды фæдыл ратификацион грамотæтæ кæрæдзимæ раттыны церемони. Мадзал уагъд æрцыд Уæрæсейы ФХМ-ы, Хуссар Ирыстоны минæвар Гасситы Знауыр æмæ уæрæсейаг дипломатон ведомствæйы сæргълæууæджы хæдивæг Григорий Карасины хайадистæй.
"Бадзырд ратдзæн фадат УФ-йы æмбæстæгтæй иудадзыг РХИ-йы территорийыл чи цæры, уыдон пенситыл схæцын Цæгат-Кавказаг Федералон зылды пенсион ифтонгады æмвæзады онг", — дзырдæуы хъусинаджы.
Документ Хуссар Ирыстоны парламент сратификаци кодта 2016 азы 29 декабры, Уæрæсейы Федерацийы Федералон æмбырд та 2017 азы 3 апрелы æмæ йæ тыхы бацыд ратификацион грамотæтæ кæрæдзимæ раттыны фæстæ.
