ЦХИНВАЛ, 16 май — Sputnik, Хъотайты Мария. Хуссар Ирыстоны парламент схъӕлӕс кодта республикӕйы премьер-министрӕй Пухаты Эрикы снысан кӕныны тыххӕй.
Цхинвалы дыццӕджы цы парламентон сесси уагъд ӕрцыд, уый сӕйраг фарст уыд ӕркӕсын республикӕйы премьер-министры бынатмӕ Пухаты Эрикы кандидатурӕмӕ, кӕцыйы 5 майы президент Бибылты Анатолий бавдыста парламентон корпусмӕ сфидар кӕныны тыххӕй.
Президент хайад райста рабадты. Уый бахатыд депутаттӕм, цӕмӕй балӕууой Пухаты Эрикы кандидатурӕйы фарс ӕмӕ йӕ схуыдта фӕлтӕрдджын къухдариуӕггӕнӕг, кӕцы ӕххӕст кӕндзӕн йӕ размӕ лӕууӕг хӕстӕ.
Пухаты Эрик хъӕлӕсӕппӕрсты размӕ радзырдта депутаттӕн йӕ куысты сӕйраг фӕдыздӕхтыты тыххӕй, се ‘хсӕн уый банысан кодта чысыл ӕмӕ астӕуккаг амалиуӕгад кредитон фӕрӕзтӕй ифтонг кӕныны фонд саразын, экономикӕйы реалон сектор сӕндидзын кӕнын ӕмӕ чиновниктӕй сӕ бакӕнгӕ куысты фӕстиуджытӕ домын.
Сусӕг хъӕлӕсӕппӕрсты фӕстиуӕгӕн Пухаты Эрикы кандидатурӕйы фарс рахӕцыдысты 32 депутаты — сессийыл чи уыд, уыдон иууылдӕр.
Хуссар Ирыстоны хицауад йе ‘ххӕстбартӕ суӕгъд кодта 24 апрелы, президент Бибылты Анатолийы йӕ бынатмӕ бахизыны фӕстӕ. Министрты ног кабинеты сфидары онг министрӕдты сӕргълӕуджытӕ ӕххӕст кӕндзысты сӕ хӕстӕ.
