ЦХИНВАЛ, 23 май — Sputnik, Болататы Алина. ӔЦСК-ы æрдæгхъахъхъæнæг Зæгъойты Алан цы футболон турниры сорганизаци кодта, уый райдыдта дыццæджы, цæгатирыстойнаг Беслæны. Ерысты хайад исынц командæтæ Цæгат Кавказ æмæ Хуссар Ирыстонæй. Журналисттæн Зæгъойты Алан куыд радзырдта, афтæмæй ахæм матчтæ сты æнæаргъ фæлтæртдзинад æрыгон спортсментæн. Кæддæр зындгонд футболист йæхæдæг дæр райдыдта ацы турнирæй.
"Турнир — сывæллæтты футболон лига — рагæй цæуы уагъд. Мæхæдæг дзы хъазыдтæн, фæстæдæр æй рацарæзтой. Ӕз æй фыццаг хатт уадзын, фæлæ мæ бон у фидарæй зæгъын, лигæ æрвылаз дæр кæй цæудзæн уагъд Беслæны, æрыгон спортсментæн æндæр горæттæм цæуыны фадат дæтгæйæ… Ӕппæт адæттæ здæхт сты æрыгон лæппуты рæзтмæ", — банысан кодта Зæгъойты Алан.
Ӕрбайгомы церемонийы уыд концертон программæ æмæ автограф-сесси дæр.
Ӕдæппæт турниры призон бынæттыл тох кæнынц аст командæйы: Беслæн, Мæздæг, Анжи (Махачкала), Ставрополь, Цхинвал, Юность (Дзæуджыхъæу), Ессентуки æмæ Алани.
Сывæллæтты футболон лигæ Беслæны адарддæр уыдзæн дыууæ боны. Ерысты фæстиуджытæм гæсгæ, бæлвырд æрцæудзысты уæлахиздзау æмæ призер, кæцытæ рахиздзысты финалмæ æмæ стох кæндзысты сывæллæтты футболон лигæ "Большие звезды светят малым"-ы чемпионы номыл командæтимæ æппæт Уæрæсейæ.
