ЦХИНВАЛ, 30 май — Sputnik, Плиты Фатимӕ. Хуссарирыстойнаг боксертӕ æрыздæхтысты Цæгат Ирыстоны уагъд цæуæг æхсæнад "Динамо"-ы турнирæй уӕлахизтимӕ. Ӕртæ боны ерысты фæстиуæгæн сыгъзæрин майдантæ райстой аст цхинвайлаг чысыл боксеры, дыууæ спортсмены та — æвзист майдантæ.
Ерысты архайдтой 2003-2004 æмæ 2005-2006 æзты гуырд боксертæ. Хуссар Ирыстонæй турнирмæ ацыд спорты галуан "Олимп" æмæ Уæлдæр спортивон дæсныйады скъолайы (УСДС) хъомылгæнинæгтæ.
"Ӕртæ боны дæргъы цыдысты тохтæ, уыд дзы развæлгъау, æрдæгфиналон æмæ финалон фембæлдтæ. Уæлдæр спортивон дæсныйады скъолайы боксертæ æртæйæ ссисты уæлахиздзаутæ — Яралов Яник, Коцты Георгий æмæ Оттаты Рауль, дыккаг бынат та райста Зæгъойты Алан", — радзырдта УСДС тренер Хаситы Владислав.
Уый ма банысан кодта, канд сæ хъомылгæнинæгтæй кӕй не ʻсты сæрыстыр, фæлæ ма спорты галуан "Олимп"-ы хъомылгæнинæгтæй дæр — ацы секцийы минӕвӕрттӕй та расгуыхтысты æхсæзæй.
Боксӕй спорты мастер, "Олимп"-ы секцийы тренер Дзигойты Ацæмæз Sputnik радзырдта, йæ хъомылгæнинæгтæн уæлахизæй пайдадæр кӕй у фæлтæрддзинад.
"Кæй акодтон, уыдонæй йæхи лæмæгъ ничи равдыста, цхинвайлаг боксертæ иууылдæр уыдысты æнтыстджын. Багаты Марат, Гæджиты Гурам, Хаситы Сослан, Цхуырбаты Олег æмæ Гуыцмæзты Георгий ссисты уæлахиздзаутæ, дыккаг бынат та райста Гæбæраты Ирбег. Уæлахизæй сæйрагдæр нын у фæлтæрддзинад райсын — ныр нæ бон у æдæрсгæйæ архайын республикон чемпионатты, чысыл боксерты бацыд ныфс", — балхынцъ кодта тренер.
Фæсивæды цæттæ кæнынц тренертæ Дзигойты Ацæмæз, Хаситы Владислав, Гæбæраты Гамлет æмæ Цоциты Эдгар.
Стыр Уæлахизæн нывонд спортивон æхсæнад "Динамо"-йы турнир цыд 27-29 маймæ. Архайдтой дзы 180 боксеры онг Дзæуджыхъæу, Мæздæг, Ессентуки, Цхинвал, Минводтæ æмæ Цæгат Кавказы æндæр горæттæй.
