ЦХИНВАЛ, 30 май — Sputnik, Босыкты Наталья. Сывæллæтты республикон конкурс "Амондджын сабибонты" жюри сбæлвырд кодта уæлахиздзауты. Хуссарирыстойнаг сабидон "Дининæг"-ы цытджын мадзал нывонд уыд сывæллæтты æхсæнадæмон бонæн.
Республикæйы скъолаагъоммæ, иумæйаг æмæ уæлæмхас ахуырады управленийы сæргълæууæг Джиоты Нинайы ныхæстæм гæсгæ, йæ сырæзты бонæй фæстæмæ конкурс равдыста позитивон ивындзинæдтæ рæзгæ фæлтæры царды.
"Азæй азмæ сывæллæтты куыстытæ кæнынц позитивондæр. Кæд иууыл сæрæй уыдон сæйраджыдæр ныв кодтой танктæ, æфсæддон дарæс æмæ хæцæнгарз, уæд ныр та ныв кæнынц сæ бæллицтæ æмæ дунейы уынынад — цъæх арв, рæсугъд хæдзар, машинæ æмæ æрдзы аивдзинæдтæ", — загъта уый.
Ӕрыгон нывгæнджытæ æдзынæгæй æмæ энтузиазмимæ гæххæтыл уагътой сæ хъуыдытæ — "амондджын сабибонты" æмбарынад. Республикæйы скъолаагъоммæ уагдæтты хъомылгæнджытæ æмæ сабиты ныййарджытæ æнæрхъæцæй æнхъæлмæ кастысты конкурсы фæстиуджытæм.
Сывæллæтты куыстытæ фенынмæ æрбацыд президент Бибылты Анатолий дæр. Уый загъта бузныг хъомылгæнинæгтæ æмæ ахуыргæнджытæн бакæнгæ куысты тыххæй, йæ цæст сын бауарзта сабыр арв æмæ амондджын фидæн, алчи дæр сæ аккаг хъæбулæй куыд басгуыха. Йæ раныхасы кæрон президент систа къам чысыл конкурсанттимæ. Алкæцы сабийы дæр фæндыд уымæ æввахсдæр балæууын.
Æртыккаг бынат адих кодтой 7-æм æмæ 16-æм сабидæтты хъомылгæнинæгтæ Дзукъаты Диана æмæ Хуыбылты Валерия, дыккаг бынаты хицау бацис 2-æм сабидоны хъомылгæнинаг Гæбæраты Мария. Уæлахиздзауы диплом та лæвæрд æрцыд чысыл Галуанты Ӕхсæртæгæн 12-æм сабидонæй.
Конкурсы уæлахиздзауты æмæ хайадисджыты схорзæхджын кодтой дипломтæ æмæ лæвæрттæй.
