ЦХИНВАЛ, 5 июн — Sputnik. Цæгат Ирыстоны æрыгæтты хсӕн IX-æм æфсæддон аивæдты хъæзтыты цхинвайлаг командӕ рамбылдта фыццаг бынат кёкусин-Кан каратэйæ. Уæлахиздзау командæйы ном каратисттӕ рахастой цыппар сыгъзæрин, иу æвзист æмæ иу бронзæ майдан рамбулгӕйӕ, фехъусын кодта Sputnik дзюдойы спорты мастер, кёкусин-Кан каратэйы тренер Созаты Владимир.
Командæйæн фыццаг бынæттæ æрхастой Дудайты Донна, Гаглойты Диана, Тедеты Аня æмæ Тадтаты Роман, дыккаг бынат райста Сиукъаты Скиф æмæ æртыккаг бынат та Пухаты Михаил.
"Хуссар Иры къорд райста фыццаг комадон бынат. Дудайты Донна æмæ Гаглойты Диана иумæ цæттæ кæнынц, сты æмгæрттæ æмæ иугъуызон æнтыстытимæ архайынц æппæт турнирты. Тедеты Аняйы мæ рахицæн кæнын фæнды, уымæн æмæ йæ фыццаг ерыстæ уыдысты æмæ райста фыццаг бынат, кæд æрмæстдæр цалдæр мæйы цæттæ кæны, уæддæр.Чызджыты æнтыст сфæлхат кодта Тадтаты Роман дæр", — радзырдта сæ тренер.
Созаты Владимир ма радзырдта, командæйы аннæ дыууæ минæвар Сиукъаты Скиф æмæ Пухаты Михаил сæ тренировкæтæм кӕй раздæхтысты æртæ мæйы размæ ӕмӕ "уымæн уыдысты сæ фембæлдты фæстиуджытæ мæгуыраудæр".
Ныр та командæ йæхи цæттæ кæны бæрзонддæр æмвæзады ерыстæм сентябрьмæ.
Каратисттӕн хъӕзтытӕм ацæуынæн финансон æххуыс бакодта фæндагарæзтады комитеты сæрдар Гуыззыттаты Эдуард.
