ЦХИНВАЛ, 9 июн — Sputnik, Биазырты Дзерассӕ. Сылгоймӕгты алайнаг моладзандоны Алагиры кусынц донивылды фӕстиуджытӕ аиуварс кӕныныл. Тӕрккъӕвдайы фӕстӕ моладзандоны территорийыл цы чысыл цӕугӕдон ис, уый раивылд ӕмӕ фӕласта фӕндаг Сывӕллӕтты реабилитацион центрмӕ, цыран ныртӕккӕ улӕфынц 25 сабийы.
Ӕрдзон бӕллӕхы фӕстиуӕгӕн ма моладзандон ӕмӕ реабилитацион центр баззадысты ӕнӕ донифтонгадӕй. Ныртӕккӕ доны проблемӕ аиуварс кодтой, уагъд цӕуынц ӕндӕр ӕндидзӕн куыстытӕ дӕр.
"Донӕй ифтонгад сног кӕныны ӕмӕ фӕндаг сцалцӕг кӕныны нӕм ӕххуысы къух фӕдаргъ кодта организаци "Спецтепломонтаж", — загътой Sputnik моладзандоны.
Игуменья Нонна куыд радзырдта, афтӕмӕй донивылдты рӕстӕджы моладзандоны фӕзыны дыууӕ стыр проблемӕйы — хид сывӕллӕтты центрмӕ, кӕцы амцӕф-умцӕфтӕй арӕзт ӕрцыд ивгъуыд ӕнусы 70-ӕм ӕзты, афтӕ ма доны гуылфӕнтӕ, кӕцытӕ тӕрккъӕвдаты рӕстӕджы ӕрбакӕлынц моладзандонмӕ Транскамӕй.
