Уæрæсейы бон Цхинвалы сæйраг культурон-хиирхæфсæн мадзæлттæ райдыдтой изæры Къостайы цырты цур скверы. Адæмон сфæлдыстады центр æрбайгом кодта къамты равдыст. Ирон литературон æвзаджы бындурæвæрæг Хетæгкаты Къостайы цырты асинтæ æмæ йæ алфæмбылай сӕвӕрдтой архивон къамтæ, Гæбæраты Нелли, Габаты Владимир æмæ ӕндӕр авторты къамтæ. Экспозицийы фенæн уыд Ирыстоны æрдз, сырдтæ, зындгонд гоймæгтæ æмæ дзуттæгты квартал.
Центры призтæ æмæ лæвæрттæ рамбулыны сæраппонд дугъты æмæ сфæлдыстадон конкурсты архайдтой сывæллæттæ. Сабитæ æмæ фæсивæд сæ арæхстдзинад равдыстой симд, хонгæ æмæ æндæр кафтыты, стæй ма дугъ кæнынæй ӕмӕ пурти хæссынæй. Сæххæст кодтой зарджытæ æмæ дзырдтой æмдзæвгæтæ. Иууыл уæндондæр, æвзыгъд æмæ цырд фæсивæд ацыдысты пуртитӕ, хъазӕнтæ æмæ адджинæгтимæ. Уӕрӕсейы бон балхынцъ ис изӕры 9 сахатыл.
