Хуыджеты Аза у вазыгджын æмæ алыварсон адæймаг. Йæ фыды фæндонмæ гæсгæ, ссис акушер-гинеколог æмæ цæрæнбонты йæ зæрдæ не ′сивта йæ профессийыл.
Фæлæ ма, царды сæйраг хъуыддагæй дарддæр, Аза Александры чызгæн ис æндæр егъау уарзон хъуыддаг дæр. 30 азы размæ райдыдта æмбырд кæнын рагон дзаумæттæ. Уæдæй фæстæмæ йæ коллекци тынг рауæрæх æмæ ныр ахсы Цъорбисы хъæуы йæ фыды хæдзары дыккаг уæладзыг æнæхъæнæй.
Азайы ныхæстæм гæсгæ, бирæ адæмæн нæй фадат кæнæ фæндон рагон дзаумæттæ дарын, кæцытæ сын баззадысты сæ фыдæлтæй. Уымæн ис тынг уарзæгой æмæ арæхстджын ахаст алы дзаумамæ дæр, уымæн æмæ уый у райгуырæн къуымы историйы хай. Йæ бæллиц у бакæнын рагон ирон цардуаджы музей йæ фыды хæдзары, уадзын экскурситæ скъоладзаутæ æмæ цымыдис чи кæны, уыцы адæмæн.
Кæронмæ æххæст музейæн Азайæн нæ фаг кæны цалдæр ахсджиаг экспонаты, фæлæ æввахс рæстæджы ацы пробемæ скъуыддзаг æрцæудзæн æмæ музей æрбайгом кæндзæн йæ дуæрттæ. Мах зæрдæ та Азайæн зæгъы æнтыстытæ ахæм ахсджиаг æмæ хорз хъуыддаджы.
