ЦХИНВАЛ, 22 июн — Sputnik. Цæгат Ирыстоны Хæтæлдон, Дзуарыхъæу, Хъæдгæроны хъæуты æмæ станицæ Змейскæйы тæрккъæвдаты фæстиуджытæ иуварс æрцыдысты, хъусын кæны мыхуыры фæрæз "Слово" РЦИ-А æрдзон ресурстæ æмæ экологийы министрады пресс-службæйы информаци.
Тæрккъæвдаты тыххæй уавæр нырма у вазыгджын Алагиры, Ӕрыдоны æмæ Дыгуры районты.
Доны бын фæарфдæр, донвæд асыгъдæг æмæ фæуæрæхдæр кæныны фæдыл æнæмæнгхъæуæг куыстытæ бакæныны тыххæй республикæйы æрдзы министрад æрбангом кодта æнæмæнгхъæуæг техникæ. Куыстытæ иу бон дæр не ′рлæууыдысты. Куыстыты фæстиуæгæн боны кæронмæ Бирæгъзæнг, Къодахджын æмæ Црауы бантыст рæстæгмæ ахизæнтæ цæугæдæтты сæрты саразын æмæ змæлд сæндидзын кæнын.
Уавæр ис республикæйы сæргълæууæджы сæрмагонд контролы бын. Битарты Вячеслав базонгæ ис ныппырхгонд объекттыл куыстыты цыдимæ æмæ бахæс кодта оперативон æгъдауæй ауадзын æппæт æнæмæнгхъæуæг куыстытæ æрдзон бæллæхы фæстиуджытæ аиуварс кæнынæн.
