ЦХИНВАЛ, 27 июн — Sputnik. Хуссар Ирыстоны Дзауы æмæ Цхинвалы скъола-интернатты, Ленингоры сывæллæтты хæдзар æмæ сидзæр сабиты иу къорд афæндараст сты дыццӕджы улæфынмæ Санкт-Петербургмæ. Къуырийы дæргъы сывӕллӕттӕ зонгæ кæндзысты уæрæсейы рæсугъддæр горæты фенддаг бынæттимæ, фехъусын кодта Sputnik Цхинвалы скъола- интернаты директоры хæдивæг Харебаты Марина.
"Цхинвалы уӕвӕг "Международный Расчетный Банк" сарæзта балц хистæр кары сидзæр сывæллæттæн Петербургмæ. Къорды сконды сты Дзауы скъола-интеранты, Ленингоры сывæллæтты хæдзары æмæ Цхинвалы скъола-интернаты сидзæр сывæллæттæ", — загъта Харебаты Марина.
Хуссарирыстойнаг къорды сконды, йӕ ныхӕстӕм гӕсгӕ, ис 22 адæймаджы, уыдонӕн сӕ улӕфт адарддӕр уыдзӕн 8 июльмæ.
"Сывӕллӕттӕн бацӕттӕ кодтой хъæзныг культурон программæ", — банысан кодта Харебаты Марина.
Афтӕ ма организатортӕ бацæттæ кодтой кæстæр кары сывæллæтты номыхыгъд дæр, уыдон та гæнæн ис æмæ ацæуой улӕфынмӕ дыккаг къорды.
