ЦХИНВАЛ, 3 июл — Sputnik, Болататы Алина. Цæгат Ирыстоны ирвæзынгæнджытæ æрцахстой агрессивон бирæгъы Дзæуджыхъæуы Хетæгкаты Къостайы номыл культурæ æмæ фæлладуадзæн централон парчы, хъусын кæны регионалон УУМ-ы пресс-службæ.
"Диспетчерон службæмæ фæдзырдтой, парчы цы адæм улæфыдысты, уыдон. Цæстæйфенджыты ныхæстæм гæсгæ, сырд лæбурдта сывæллæттæм æмæ хистæр кары адæммæ. Уымæй фервæзынæн уыд æрмæстдæр иу фæрæз — фæдзурын ирвæзынгæнæн службæмæ", — загътой уагдоны пресс-службæйы.
Ирвæзынгæнджытæ æвæстиатæй атындзыдтой централон паркмæ, развæлгъау ветеринармæ фæдзургæйæ. Иумæйаг архæйдтыты фæрцы сын бантыст сырды æрцахсын.
Куыд рабæрæг, афтæмæй хъæддаг сырд алыгъд Дзæуджыхъæуы цæрæджы хисæрмагонд хæдзары вольерæй. УУМ-ы куыд банысан кодтой, афтæмæй ныртæккæ сырд нал у тасхæссæг цæрджытæн.
