ЦХИНВАЛ, 12 июл — Sputnik, Плиты Фатимæ. Хуссар Ирыстоны сывæллæтты æмæ æрыгон фæсивæды боксы скъолайы тыхджындæр минæвæрттæ стох кæндзысты æхсæнадæмон турниры Кисловодскы. Спортивон скъолайы спаррингты фæрцы фæбæрæг ис 7 æнтыстджындæр боксеры, уыдон хъахъхъæндзысты Хуссар Ирыстоны спортивон кад ерысты, фехъусын кодта Sputnik скъолайы минæвар Кокойты Ирбег.
Джиоты Вадим, Джиоты Арсен, Кокойты Хетæг, Кокойты Аслан, Аль-дамари Алан, Ӕлборты Сослан æмæ Цхуырбаты Мурат сеʻппæт дæр сты æхсæнадæмон ерысты уæлахиздзаутæ.
"Фæсивæд афæндараст уыдзысты сæ физикон цæттæдзинад æмæ арæхстдзинад рингыл бафæлварынмæ. Фæсивæды активонæй цæттæ кæны скъолайы директор, тренер Кокойты Мурат. Сæрдыгон улæфтытæ æрвитынц тренировкæты, æрвылбон дæр дыууæ хатты цæуы цæттæгæнæн куыст. Ӕз афтæ хъуыды кæнын, сæ фыдæбон æнæхъуаджы нæ фæуыдзæн æмæ ацы хатт дæр райсдзысты сыгъзæрин майдантæ", — загъта уый.
Йæ ныхæстæм гæсгæ, Кисловодскы спортивон базæйы æмрæстæджы цæуы æрыгæтты æмæ хистæрты хсæн дæр ерыстæ. Фæсивæд канд сæхæдæг не стох кæндзысты, фæлæ ма сын фадат уыдзæн фæлтæрд æмæ зындгонд боксерты ныхмæлæудмæ бакæсын.
Ерыстæ цæудзысты къуырийы кæрон Кисловодскы. Ныридæгæн скъуыддзаг цæуы боксерты арвитынæн финансон хæрдзтæ самал кæныны фарст.
