ЦХИНВАЛ, 2 авг — Sputnik. Цхинвалы сывæллæтты æмæ æрыгæтты футболы скъолайы командæтæ стох кæндзысты Цæгат Ирыстоны фыццагады æмæ æхсæнадæмон турниры Хъырымы, фехъусын кодта Sputnik футболы скъолайы директор Битеты Зауыр.
Ног сезоны сывæллæтты футболы командæтæн æрвылкъуыри уыдзæн фембæлдтæ цæгаттаг æрыгон футболисттимæ.
"Нæ фæнды ис 2004-2005 æзты гуырд сывæллæтты дыууæ командæйы сентябры акæнын Цæгат Ирыстон—Аланийы фыццагадмæ. Планмæ гæсгæ, сывæллæттæ цæудзысты ерыстæм цæгатмæ алы хуыцаубоны дæр. Нæ командæ "ИР-Цхинвал", кæцы июны рамбылдта "Лига Надежд-2017" Сочийы, азы кæрон та ногæй йæ тыхтæ бавзардзæн Хъырымы æхсæнадæмон футболы турниры", — загъта Битеты Зауыр.
Хуссар Ирыстоны сывæллæтты æмæ æрыгон фæсивæды скъолайы хъомылгæнинæгтæ ныридæгæн сты сæрдыгон улæфтыты. Командæтæ тренировкæтæм бавналдзысты 20 августæй.
