ЦХИНВАЛ, 11 авг — Sputnik. Цæгат Ирыстоны ацыд Туаты Теминæйы документалон киноныв "Китай. Аланты фæд"-ы премьерæ, хъусын кæны ПТРК "Алания".
Æвдыст дзы цæуы скифтæ, сæрмæттæ æмæ аланты бастдзинад Китаимæ. Уыцы историон цау Аланийы хъысмæтыл ныууагъта стыр фæд. Ацы киноныв у "Аланийы историйы" циклæй 9-æм. Туаты Теминæ дзы æвдисы 13-æм æнусы цаутæ. Сфæлдыстадон къорд ыл куыста 6 азы.
"Ацы премьерæмæ æз æнхъæлмæ кастæн 6 азы, уымæн æмæ мах киноныв истам 2010-æм азæй. Кино текст нæу, фæлæ фыццаджыдæр нывист, уымæ гæсгæ хъуыд ссарын ахæм хуызтæ, кæцы æххæстæй фенын кодтаиккой нæ радзырд. Ӕрцыд егъау куыст", — радзырдта фильмы режиссер Туаты Теминæ.
Документалон фильм фыццаг федтой фæсивæдон этнолагерь "Аланты фæд"-ы хайадисджытæ Турк, Венгри, Таджикистан æмæ Гуырдзыстонæй.
Алантæ историкон фæд ныууагътой Ази, Европæ æмæ Африкæйы алы бæстæты. Фæлæ Китай аланты историйы ахсы сæрмагонд бынат.
