ЦХИНВАЛ, 14 авг — Sputnik. Дзауы районы фӕсивӕд сӕ тыхтӕ ӕвзарынц культурӕ ӕмӕ спорты фестивалы. Къуырийы дӕргъы ерысты фӕбӕрӕг уыдзысты районы хуыздӕр командӕтӕ волейболӕй, футболӕй ӕмӕ теннисӕй, фехъусын кодтой Sputnik районы администрацийы пресс-службӕйы.
Культурӕ ӕмӕ спорты фестиваль цӕуы фыццаг хатт, фӕлӕ районы къухдариуӕггӕнӕджы фӕндмӕ гӕсгӕ хъуамӕ суа ӕрвылазон.
"Мадзалы архайынц поселочы, хъӕуты ӕмӕ горӕт Къуаисайы командӕтӕ. Ӕртыццӕджы фӕбӕрӕг уыдзысты тыхджындӕр къордтӕ волейболӕй, футболӕй ӕмӕ теннисӕй. Ацы аз у фӕлварӕн. Районы администрацийы сӕрдар Макъоты Уырызмӕджы фӕндмӕ гӕсгӕ мадзал суыдзӕн ӕрвылазон фестиваль стырдӕр гуырахстимӕ — йӕ фӕлгӕттты цӕудзысты равдысттӕ, концерттӕ ӕмӕ спорты бирӕ хуызтӕй ерыстӕ", — загътой районы пресс-службӕйы.
Спортивон ерыстӕн хатдзӕгтӕ саразыны фӕстӕ районы культурӕйы хӕдархайгӕ коллективтӕ ратдзысты иумӕйаг гом концерт Дзауы.
