ЦХИНВАЛ, 15 авг — Sputnik. Ивгъуыд æхсæв Цхинвалы рауарыд рагæй кæмæ æнхъæлмæ кастысты уыцы къæвда. Фæстаг дыууæ къуыри 40-градусон æнтæфтæй цы цхинвайлæгтæ тыхстысты, уыдонæн къæвда ссис æхцондзинад хæссæг æрдзы лæвар. Социалон хызæгты пайдагæнджытæ цингæйæ мыхуыр кодтой сæ аккаунтты æхсæвы къæвдайы къамтæ.
Хуссар Ирыстоны нæй метеорологон станц, фæлæ интернет-ресурсты информацимæ гæсгæ, боныгъæд фæуазалдæр уыдзæн ацы къуыри.
Фæстаг дыууæ къуырийы мидæг цы æнтæф лæууы, уый ссис иууыл арæхдæр темæ Хуссар Ирыстоны столицæйы цæрджытæн. Куысты, телефонæй æмæ таксийы, адæм æндæр ницыуал дзурынц. Бирæтæ та хъаст кæнынц, сæ бон кусын кæй нæу тæвды.
Ацы сæрд иууыл стырдæр фæлварæн ссис зæрдæйы низтæй рынчын адæмæн. Цхинвалы тагъд æххуысы станцы Sputnik фехъусын кодтой, сæрдыгон мæйты кæй фæарæхдæр сты тагъд æххуысы медиктæм фæсидттæ.
"Зæрдæйы низтæй рынчын адæм æнтæфы хъуамæ райсой сæрхизæн мадзæлттæ. Йæ холестерин, сæкæр бæрзонд кæмæн сты, тамако чи дымы, уыцы адæм хъуамæ сæхи хизой инфаркттæй, инсульттæй æмæ рæстæгыл нуазой, дохтыртæ сын цы хостæ рафыстой, уыдон. Афтæ ма хъуамæ ма лæууой хуры комкоммæ тынты бын", — бафæдзæхстой тагъд æххуысы медиктæ.
Адæм сæхи æппарынц горæты æнтæфæй цæугæдæтты æмæ цæдты былтыл фæсгорæт. Улæфт бонты кæй фæнды æрдзы хъæбысмæ ацæуын, уый хъуамæ ацæуа сæймæрайсом, цæмæй бацахса бынат аууоны.
