ЦХИНВАЛ, 15 авг – Sputnik. Хуссар Ирыстоны хицауад ракодта арæнгæрон зонæйæ фондз хъæуы Знауыры районы æмæ дыууæ хъæуы ты Ленингоры районы, хъусын кæны Паддзахадон æдасдзинады комитеты пресс-службæ.
Ведомствæйы куыд банысан кодтой, афтæмæй 9 августы министрты кабинет райста уынаффæ республикæйы территорийыл арæнгæрон зонæ саразыны æмæ паддзахадон арæны хæрзарæзтады фæдыл.
"Уынаффæмæ гæсгæ арæнгæрон зонæйæ раконд цæуынц Знауыры районы – Бадат, Бахъаты-хъæу, Зиууат, Фæзыхъæу, Дзæгъæлкомы хъæутæ æмæ Ленингоры Павлиаты æмæ Елойты хъæутæ, афтæ ма автомобилон фæндаг Аунеу-Зиууат-Знауры фадыг", — банысан кодтой ПӔК-ы.
Ивындзинæдтæ нæ хауынц арæнгæрон зонæйы фæсарæйнаг æмбæстæгты уæвынадмæ – уыдонæн уырдæм бацыд æмæ уæвынады тыххæй райсын хъæуы индивидуалон кæнæ коллективон пропусктæ, уыимæ иумæ сæм хъуамæ уа гоймагдзинад бæлвырдгæнæн документтæ.
