ЦХИНВАЛ, 16 авг — Sputnik. Фыццаг ирон промоутерон компани "Iron Legion" расидт æвзæрст Ирыстоны иууыл амбициозон спортивон проекттæй иу – боксы турнир "Лæджыхъæд"-ы хайадисты фæдыл. Уый тыххæй хъусын кæны портал Градус Осетии.
Турниры уникалондзинад ис уый мидæг æмæ дзы хайад райсыны фадат кæй ис алкæмæн дæр, профессионалон боксертæй дарддæр. Хайадисджыты кар – 18+.
"Ацы проект у уникалон фадат лæджыхъæд равдисынæн, фæсивæдæн дæнцæг суæвын, кæцыйы хъæуы спортыл фæхæст кæнын æмæ уынджы æппæрццаг æндæвдадæй фæиппæрд кæнын. Стыр нысаниуæг нæй – рамбылдтай æви фæсаст дæ – рингмæ рахызты факт æмæ уæлахизмæ тырнындзинадæн дæр ис егъау нысаниуæг", — банысан кодта Iron Legion-ы президент, боксæй дунейы чемпионтæ Гасситы Мурæт æмæ Тедеты Сосланы тренер Сланты Виталий.
Уæлахиздзау суæвынæн, хайадисæджы хъæуы рамбулын æртæраундон тохы (фæйнæ 2 минуты) йæхи уæзы категорийы ныхмæлæууæджы. Уæлахиздзаутæ райсдзысты æхцайы призтæ æмæ иууыл сæйрагдæр "Лæджыхъæд"-ы Кубок.
Турнир уагъд æрцæудзæн гом рингыл æмæ æрæмбырд кæндзæн сæдæгай кæсджыты.
