ЦХИНВАЛ, 24 авг — Sputnik. Мæскуыйаг ӔЦСК-ы футболисттæ рамбылдтой швейцариаг "Янг Бойз"-ы 2:0 хыгъдæй Чемпионты лигæйы квалификацийы æмæ дыууæ фембæлды фæстиуджытæм гæсгæ рахызтысты турниры группæйон этапмæ, хъусын кæны Р-Спорт.
"Хъазт уагъд æрцыд æртыццæджы Мæскуыйы, "ӔЦСК-ы Аренæйыл" æмæ ахицæн 2:0 хыгъдæй ӔЦСК-ы пайдайæн. Уæлахиздзауты сконды пуртитæ бакодтой Георгий Щенников (45-æм минут) æмæ Зæгъойты Алан (64)", — дзырдæуы хъусинаджы.
Ӕртыццæджы бæлвырд æрцыдысты Чемпионты лигæ – 2017/18 группæйон этапы хайадисджытæ иууылдæр.
Чемпионты лигæйы группæйон этапы халæппæрст уагъд æрцæудзæн цыппæрæмы Монакойы.
