ЦХИНВАЛ, 25 авг — Sputnik. Хуссар Ирыстоны хæдбардзинады Уæрæсейы æрдыгæй банымайыныл 9 азы сæххæсты цытæн альпинистты къорд схызт республикæйы бæрзонддæр хæхтæй иумæ — Бурсамдзелмæ, фехъусын кодта Sputnik балцы организатортæй иу Къæбысты Георгий.
Бурсамдзел æвæрд у денджызы æмвæзадæй 3670 метры бæрзæндыл. Хонынц ма æй Бурхох æмæ Хурбадæн хох дæр. Ирон адæмы фыдæлтæм нымад цыд хуры бардуаджы кувæндоныл.
"Ӕртæ Георгиййæ — Санахъоты, Къæбысты æмæ Бестауты — сфæнд кодтам Бурсамдзелы хохмæ схызт саразын. Бамбал нæм сты не ʻмгæрттæ дæр æмæ æмткæй 15 адæймаджы скондæй басастам ацы бæрзæнд. Нæ балц нывонд у республикæйы суверенитеты банымадыл 9 азы сæххæстæн. Сыгъдæг хохы бæрзондæй, æгъдаумæ гæсгæ, ракуывтам Ирыстоны хорз сомбонæн", — загъта Къæбысты Георгий.
Уый ма банысан кодта, Бурсамдзелы хохы бæрзæндыл бæрæгбоны цытæн кæй æрсагътой Иры тырыса, афтæ ма систой, сæ разæй ацы хъохы цъупмæ чи схызт, уыдон капсулæ æмæ дзы нывæрдтой ног.
