ЦХИНВАЛ, 28 авг — Sputnik, Босыкты Наталья. Хуссар Ирыстоны ахуырадон уагдæтты фесты нывæзтгонд цалцæггæнæн куыстытæ, алы скъола дæр цæттæ у ног ахуыры азмæ, фехъусын кодта Sputnik ахуырады министры хæдивæг Лолаты Аслан.
"Нывæзтгонд цалцæггæнæн куыстытæ фесты, скъолатæ иууылдæр цæттæ сты ахуыргæнинæгты райсынмæ", — загъта Лолаты Аслан.
Лолаты Асланы ныхæстæм гæсгæ, ног ахуыры азмæ цæттæ сты хъæуты скъолатæ дæр.
"Цалцæггæнæн куыстытæ уагъд цыдысты Дзау, Хуыцъе, Синагур, Уахтана, Знауыры æмæ Ленингоры районты. Кæцыдæртæн раивтой сæ рудзгуытæ, астъæрдтæ, хæтæлтæ, аннæты та ауагътой мидæггагон фæлындæн куыстытæ", — банысан кодта министры хæдивæг.
1 сентябры ахуыр райдайдзæн Цхинвал æмæ республикæйы районты 53 скъолайы, афтæ ма ХИПУ, бирæпрофилон колледжы, музыкалон, медицинон æмæ аивадон ахуыргæнæндæтты æмæ дыууæ музыкалон скъолаты.
